تخطي التنقل

 

مش عارفة كيف بتتحول الجزائر لمكان كتير حميمي صعب ينترك وبنفس الوقت لمكان خرا ..
كل الجمال والتناقضات والعبثية الي خانقة هي المدينة ..
الخضوع العام المقرف والتمرد الكبير المتخبي ببيوت صغيرة ..
والبنايات الفرنسية والقهاوي.. ووجوه الناس وحكاياتن وانتماءاتن … الموسيقيين والفنانين الي بيمارسو فنن بالسر وتاركين كل شي برا مشنوق .. وبكيتات الدخان والبيرة ومحلات الدهب المقرفة والاواعي..
الكنايس المهجورة او الي حولوها لجوامع .. كل شي .. كل شي .. مجموع هون ..
امرأة ختيارة باواعي ع الطراز الفرنسي مع شابو قش كبيرة وكعب عالي يادوب ململم عضامها بتحسسني بالنشوة بين الحجابات ..
درجة من النشوة عرفتها اول مرة بحياتي هون بهي المدينة ..
مين بيصدق اني هون لسا ما شفت خمار ماشفت مرا لابسة كيس اسود يغطيها من فوق لتحت .. ع الاقل ازا لبست شي يغطيها بيكون ابيض.. هاد مابيعني انو الاسلام هون موجود بصورته البيضا ..لا موجود باخرى اشكاله وتناقضاته ..
بالجزائر فيك تعيش بلا مصاري .. فيك تاكل وتشرب بدون ماتعرف كيف .. فيك تحس بالانتماء وانعدام الطبقية ..لانو ببساطة الكل فقرا .. الجزائر هي دمشق بعد 40 سنة .. دمشق بعد ما تكمل عشر سنينها السودا وتموت وتحاول تعيش بكل خرائبها وخيباتها وبدون اي نجاح ومشي مستمر للوراء رح تكون متل الجزائر .. تماما متل اسم البوم فرقة جزائرية : قدم لورا ..
السحر هو بالفرق الكبير بين الحامي والبارد… بين احلامي وبين العدم  ..بين عقلية واحد حمار متخلف مخو تنكة وبين تنين عايشين مع بعض بالمساكنة .. المفاجئة بوجود الغير متوقع هو السحر.. بتنين عم يسبو ع الرئيس والنظام بالقهوة من صبحية ربي بلا ما يحسو بالخطر .. بسخرية انهن صريحين جدا مع حالهن وبنفس الوقت ماعندهن اي مبادرة للتغيير او التحسين ..
السحر هو اني بقعد باحد البيوت لوحدي مدة ايام طويلة ببكي من ذاكرتي   ولما اطلع ع البلكون بحس بالحب والحميمية وبلا اي حقد لكل التفاصيل وبختنق اكتر ..
بدون اي رقابة عكلماتي.. انا كبرت هون … دمشق ما حملتني غير الوجع بس انا هون كبرت ..
بكره دمشق بكره كل شي من قبل .. بكره المدنية بالشام الي حرمتني من كتير اشيا طبيعية جواتي وعلمتني اصطنع كتير تفاصيل .. بشتاق لرفقاتي وبكره انهن بعاد  بكره سيطرة اهلي وتناقضاتن اي بكرها
بحب كون لحالي ببيت بيطل عبيوت الجزائر برطوبة البحر الي بتخنق بالناس الي دايما معصبين .. بالدخان الوطني الي اتقل بكتير من دخان الحمرا ..بكمرتي..وحراكيشي ..
بفيق الصبح غسل وجي واشرب قهوتي بالقهوة .. اتشارك مع الناس ذاكرتي وذاكرتن المشوهة .. وكل وجعي .. كل كل وجعي ووجعن المحبوس جوا.. وعم نتنفسو سوا بنظراتنا وعيونا الي حتى بالصبح مليانين تعب ..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

%d مدونون معجبون بهذه: