تخطي التنقل

قضيت 3 اسابيع بالنرويج..باول اسبوع كتبت ايميل لأهلي لاقدر احكيلن تفاصيل شو عم يصير معي وشو عم يصير براسي انا بالنرويج وهنن بالجزائر وفي بيناتنا كل مسافة فلسطين وسوريا والحرب والصحرا والطفولة تبعي الي كنت فاقدة كتير تفاصيل منها ورجعت تذكرت جزء كبير منها هونيك بطريقة غريبة وحميمية ..
باحد الفقرات قلت اني لما مشيت لاول مرة باوسلو اخطلت عليي كتير افكار ومشاعر .. يمكن لما كنت ببلد اوربي من قبل كنت صغيرة حاولت قضي هداك الاسبوع بسرعة لأرجع ع البيت ومافكرت باي شي .. هلا كل شي تغير.. كبرت 7 سنين بعدها بجسمي وبتجربتي خصوصا تجربة الجزائر الي كانت سوريالية كتير ..وبعدين اجت النرويج..
بشوارع اوسلو هاي المدينة الي اسمها بينذكربكتير محطات من التاريخ الفلسطيني  انا الفلسطينية السورية عم امشي فيها وحاملة على ضهري لجوئين.. بعدين بلشت الافكار تتجه للتفاصيل متل اني كنت عم دور ع كميرات المراقبة بالشوارع لا شعوريا .. وفقت ع حالي لما ما لقيتن .. بالجامعة بسوريا وببعض شوارعها وبكل شوارع الجزائر والمكان الي بدرس فيه عدد الكميرات لا يحصى الشعور بالمراقبة بيتحول لهاجس بللاوعي وبتتعامل معو لاحقا كمان باللاوعي .. فكرة الكميرا هي الاولى بالسلسلة والي بعدين بيندرج تحتها كل تفاصيل الحياة اليومية والحرية بالعموم  ..
ماشفت كتير نرويجيين اول فترة لاني كنت باقامة فنانين بمنطقة بعيدة عن المدنية اقرب للريف وخلال هالفترة صنعت هدول الصورتين هونيك ..
..

946537_508346299234550_826667800_n

مقصلة

 

1045244_505721509497029_1757915209_n
النرويجيين عندن معلومات صحيحة غالبا عن الي نحنا بنحب نوصلو للعالم وهالشي كان بيفرحني لحد ما لاني ما اضطريت ادخل بنقاش حاد مع حدا لغيرلو وجهة نظرو.. تحديدا بخصوص الثورات .. المشكل الوحيد كان بالاسم العام .. انو بيسالوني ازا ما بتحبي تسميه “ربيع عربي”شو لكن؟ .. سؤال صعب وجوابو موجع .. بينتهي الحديث بتفاصيل موجعة عن كمية التجارب الي اذا ما بتكسر بتقوي.. بس بتوصل الانسان لمرحلة فلتان امني داخلي جواه المخ والمشاعر وبتفقد اهمية كتير تفاصيل كنا نعتقد انها استثناء..
فكرة الحرية كانت مغرية جدا فكرة اللجوء كانت مؤلمة بس مغرية كمان وخصوصا الظرف السياسي الي انا فيه والعروضات الممنوحة لهيك وضع.. قررت انو ابقى وقررت اكون اخلاقية جدا واخبر المهرجان الي تعبو كتير لجابولي الفيزا والي وثقو فيني لحد كبير وصارت العلاقة بينا كتير قوية وبعيدة عن رسميات بين مصورة ومهرجان .. خطوة اللجوء بتدمر كتير شغلات بيني وبين هدول الناس وبينهم والدولة .. كنت فكر اني عشت ظروف سيئة جداومافيني خاف من مواجهة شي .. وبأخر لحظة قبل نص ساعة من طيارتي الي حجزولي ياها لارجع قررت اني فعلا ارجع ع الجزائر وكمل تعاملي مع الناس الي دعموني باخلاقية عالية ..
وكنت كتير مبسوطة اني بدي ارجع .. اهلي ورفيقي وصحابي والحياة المليانة سوريالية بالجزائر .. والي مختلفة تماما  عن البرد الي بغطي بلاد العولمة ..
ماكنت بعرف تماما ازا بقدر ارجع فوت ع الجزائر ولا لأ  لاني استنيت توصلني موافقة الدخول حوالي اسبوعين وماوصلت .. دقيت للسفارة وطالبت برجعتي قبل بنص ساعة من السفر وكتيرالتفاصيل مربكة لاحصل ع الموافقة بهي السرعة والي تلقيتها من خلال ايميل وبعدين فاكس انبعت للمطار قبل بدقيقتين من الطيران كمان بطريقة موترة للاعصاب..
3 طيارات التانية بتطلع متاخرة تلات ارباع الساعة مما بيعني لعنت دين موعد الطيارة الاخيرة الي بتوصلني للجزائر بس بلحقها باخر دقيقة وبكتشف لما بوصل ع الجزائر انو غراضي مالحقو .. هاد التفصيل بجانب تعامل الشرطة بالمطار معي كفلسطينية ونقعي شي نص ساعة بالمكتب ليوقعلي الدخول خلاني فكر عنجد باني كنت بعالم تاني واني حمارة لاني رجعت بس كنت عم اضحك من قلبي لاني كنت بعرف تماما الوضع وانا الي اخترتو .. وبعدين بعرف انو رفيقي الي حب يجي ع المطار يشوفني بيعمل حادث ع الطريق .. وتفاصيل تانيية بتخري غير ممكن ذكرها ..
هلا عم اتذكر قديش كنت حاسة بالمسؤولية تجاه مستقبلي وكمان عيلتي لما اعمل لجوء ,بالمناسبة كلمة لجوء كتير بتخري .. وغير محتملة .. كان عندي خيارين اني ابقى واخد اقامة ولاحقا جنسية ودمر علاقتي بالمهرجان الي قادرين يدمرولي مستقبلي بالوسط الفني او اني ارجع واكسب مستقبلي بطريقة تانية كانو شيئا لم يكن .. هلا بعد اسبوع من رجعتي ع الجزائر لساتني بحس اني اخدت القرار الصح واني قدرت اشوف الجزائر من برا وبعرف هلا اني بحبها اكتر من الشام وانها اثرت فيني خلال 9 اشهر اكتر من 22 سنة بدمشق
بعرف اني راجعة ع اوربا وبعرف اني رح ادرس بشي مكان هونيك وبعرف تماما اني راجعة ع الجزائر لاحقا …

في الجزائر في الجزائر
Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

w

Connecting to %s

%d مدونون معجبون بهذه: