تخطي التنقل

 تم اعتقال كل من كندة الزاعور - لبنى الزاعور - رؤى جعفر - ريما الدالي في اعتصام مدحت باشا ظهر الأربعاء 21/11/2012  الحرية لصوت العقل


تم اعتقال كل من كندة الزاعور – لبنى الزاعور – رؤى جعفر – ريما الدالي في اعتصام مدحت باشا ظهر الأربعاء 21/11/2012
الحرية لصوت العقل

شوبقول .. شو بقول .. !
مخزي ومعيب .. يمكن هيك
بتشكـّر الكوكب اني بقعد بصور وبقرأ وبفكر أكتر من قبل لأنو مافي عندي انترنت
تحول فظيع من شهر لهلأ بازدياد كمية البؤس عند الاخرين
شوصاير للناس حتى تهاجم هدنة غزة وتقول عنها بيع دم الشهدا !
شوصاير لما بتصير ريما الدالي كافرة وبتستاهل تعتقل !
ومش عم افهم ليش في كتير شباب كانو بعتم المعتقل طلعو بعتم جواة قلوبهن
عتم للانثى, عتم للحرية, وعتم للحياة .. ماتخيلتش انو الانهزامية متوسعة بنفوذها هلقد !

بوحدة من المرات الي نزحنا فيها من البيت بمخيم اليرموك لمكان مش كتير بعيد مافيو تلفزيون ولا انترنت
فيه مشغل بابا ووشوية نباتات واسطوح عالي بقدر شوف منو الشام بالليل ..
من بعد شي 4 او 5 ايام هونيك اتصل فيني صديق عم يتطمن عليي وع الاخبار الي حواليي وبتذكر وقتا اني قلتلو مابعرف شو الاخبار وضحكت وحكينا كتير قصص وشغلات مالها علاقة بالحرب والدمار
الها علاقة بس بانسانيتنا وخبرتو وقتا اني بس اكون جاهزة رح بلش اكتب وصور اكتر واحكي للعالم اشيا رح تكون مؤلمة بس رح تكون مليانة حياة وامل ورؤى جديدة ..
بالحقيقة ماكنت مقطوعة عن الاخبار تماما, قبل هاد الاتصال بنص ساعة عرفت عن صديق صحفي استشهد بالقصف ..

المرة الوحيدة الي كنت فيها متشائمة هي لما طلعنا من المخيم لجرمانا لطريق المطار وكان كل هاد الطريق معبى دبابات وجرافات ومدرعات خصوصا عند الزاهرة.. لاخر لحظة بطريق المطار كنت عم شوف الدبابات .. وفجأة سقف المطار المنخفض جدا على عكس كل مطارات العالم بتحس انو السقف عم يطبق عليك عم يخنقك هو وغبرتو ووجوهو الباردة البشعة, وطرف الاستقبال الي فاضي تماما حتى من الموظفين ..

واليوم على  عكس اسم الجمعة (آن النصر)  ما بحس انو اقترب
وبنفس الوقت الي بشوف فيو ريما الدالي والصبايا الباقيين عرايس بنص الشام بيذكرونا انو هاد الامل الي كنت شوفو كل الوقت وكنت حس فيه حتى بابشع لحظات هو موجود .. ريما الي عم يهاجمها الكل لانها طرقت كفرية ع الفيس نسيو انو هي اشجع منهن لترجع تفتح الامل .. والخيار السلمي
ريما كتبت اول مرة .. اوقفوا القتل !
وهلا بترجع بتاكد انو القتل مو هو الحل .. القوةالعسكرية هي مش حل ..

مابعرف شوفيني اعمل لحتى يفهم الي عم يهاجم هدنة غزة انو القتل مو الحل
ازداد اعداد الشهدا مش حل ومش مصدر فخر .. العنف بجيب عنف اكتر .. القتل طريقة بشعة وضعيفة للدفاع عن النفس والرد عليها بنفس الطريقة ابشع ..
وانو يوقف القصف بغزة هي اجمل خبر ممكن اسمعو
الناس ترجع عبيوتها , وانو الاطفال ما يبقو خايفين ولا يعلق براس الاطفال صوت القذائف والصواريخ..

اول ما بلش يتكوّن الجيش السوري الحر وكنا ننتقد تصرفاتو الي ما بيعرفني منيح كان يفكرني مع النظام . بس لاني عم انتقد المعارضة “المسلحة”.. وخصوصا مجموعة من المتثاقفين والصحفيين الي مفكرين حالهن عم يتابعو الثورة بشكل عميق .. او الي مش مفرق بين الثورة السلمية والجهاد ..
لما بالقانون الدولي عرفو الي عم يصير بسوريا باسم ” حرب اهلية ” ..بكيت .. بكيت كتير
بين كلمة ثورة وحرب هي رصاصة راجعة خربت كل شي بس الحقيقة واضحة .. هي هيك

الغصة المرة لما بيصير للشعب السوري (ممثل شرعي ووحيد )
المشكلة دايما اني بلاقي ممثلين عني بس ولا مرة بحياتي لقيت مركز انتخابات يستقبلني .. لا كسورية ولا كفلسطينية
والمشكلة الاكبر هي لما بطلع ع النص التاني من هويتي
وبتطلع منظمة التحرير ممثل شرعي ووحيد و 63 سنة يا فلسطين وشعبك ناطر ..

بيجي عبالي قول انو تركو الفيس شوي ..
شربو شي دافي قبل النوم واستلقو عطو مساحة لحالكن لتفكرو وتحلمو وتخططو لبكرا
ترجعو تفكرو بكل شي برواق بدون تاثير من اراء حدا حواليكن
سوريا لكل السوريين
وفلسطين لكل الفلسطينية
رح يكونو النا لما بنفكر صح لما بنهدى وبنسمع بعض ولما بيكون كل واحد عم يحكي وجهة نظرو الي مش متبنيها من حدا غيرو .. عم حاول ماحس حالي عم نظّر بس كتير انخنقت لما قرأت الاخبار والتعليقات ع الفيس
يعني عن جد كان شي مخزي ومعيب …

وعكل في خبرية اني صرت جاهزة لاكتب واحكي وصور وهاد المشروع قريبا رح يكون جاهز بس بدو شوية وقت ..

Advertisements

One Comment

  1. بوسة


اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

w

Connecting to %s

%d مدونون معجبون بهذه: